Category: وتار

هاوپۆل: وتار

سلاڤ گەلۆ!

راستە دەمەکە ژهەوە دیرم و دشێم بێژم هەر چ بابەتەک من نە نڤێسیە یان ژی نە ئینایە رۆژەڤێ ئەگەر ژی بۆ وێ چەندێ دزڤرن، باوەرم کۆ هەر کەس جار و جارا دڤێ ژیانێ دا مۆژیلێ هنەک ژ کار و بارێن خوو یێن کەسی دبیت، دا گەلەک درێژ نەبیت من دڤێت ب رێکا ئەڤی وێنەیی ژ ئەرشیفێ خوو یێ بەری ( 2015 )ێ کۆ رۆژا جەژن بوو چەند بیرهاتنا و پەیامەکێ پێ بگەهینم.

هەر کەس ژمە دەمێ کار و خەباتەکێ دهەلبژێریت، مەرەم ژێ چەند خالەکن:

  • پەیام
  • ئارستە
  • ڤیانا کارێ ھەلبژارتی
  • شیان
  • پێشئێخستنا کاری د پراکتیکیدا
  • پاریێ ژین و ژیارێ،

ئەز دێ ل سەر خالا دوماهیێ راوەستم :

کار و ئارستە و ڤیانا کارێ هەلبژارتی و شیان و پێشئێخستنا کاری دپراکتیکیدا ئەڤە هەمی ل ئالیەکی و خالا دووماهیێ ئەوا من ل سەری باس لێکریی کۆ پاریێ ژین و ژیارێ یە ل ئالیەکێ دیتردا. ژبەرکۆ پتریا مەدیاکار و رۆژنامەنڤیسێن مە ئەڤرۆ خوو پێشنەئێخستینە بەلکۆ دجێهدا ماینە و مژۆیلێ پاریێ ژین و ژیارا خوونە.
گەلەک یا جوانە مرۆڤ هزر دڤێ خالێ دا بکەت لێ گەلەک یا لەنگە مرۆڤی ئەو خالێن من ل سەری دیارکرین ل دەف نەبن، ئەها لڤێرێ ئاریشێن جڤاکی مەزن دبن ژ بەرکۆ رۆژنامەنڤیس مۆژیلێ پاریێ ژین و ژیارا خوو دبن و نەشێن درۆست کاربکەن. و ئەڤ نەبوونا کریارێ بۆ سازیێن مەدیایێ د بیتە خالەکا ئەرینی و دبەرژەوەندیا وان دا یە، د بەرامبەردا بۆ جڤاکی ب نەرینی دزڤریت ژ بەرکۆ دەستهەلاتا چارێ پیتەیی پێنادەت، کۆ دراستی دا ئێک ژ کارێن وێ پیتەدانە ب جڤاکی.

ل دوماھیێ دێ بێژم:

دڤێت جڤاک ب هشیاری سەرەدەریێ دگەل رۆژنامەڤانان بکەت و بزانیت دێ چەوا نەچارکەت کێشا وی گەهینیت و ل دویڤ چیت تا دەرئەنجامی ئەگەر نە دێ جڤاک دجێهدا مینیت و پاشکەفتن دێ هەر بەهرا وان بیت.

من چجار پرسیار بۆ مێهڤانێن خوو بەری پەخشێ زندی ئامادە نەدکرن داکۆ مێهڤانێن من داخوازا پرسیارا ژ من نەکەن. گرۆڤە ل سەر گۆتنا من دڤی وێنەیدا کۆ دزڤریت بۆ پێنج خولەکا بەری پەخشێ زندی و ئەز مۆژیلێ نڤێسینا چەند سەرخالەکا ژتەوەرێ ئامادەکریی یێ پرۆگرامی بووم.

نڤێسین
ھۆگر مۆحەمەد سلێڤانەیی
سوێد / ستوکھۆلم
٣٠-٠٦-٢٠١٩

نەمان باشترە ژ هەبوونەکا نەیی.

دمژمێر ٠٣:٥٦ بەرێ سپێدێ بوو!

ل وی دەمی دەمژمێر 03:56 خۆلەکێن بەرێ سپێدێ بوو چ دەنگ ژ جهێ کاری نەدهاتن ژبەرکۆ نەدەمێ ئاسایی یێ کاری بوو، بەلکۆ ئەو پتر ژ (11) دەمژمێرابوو ئەز ژ دەواما خوو یا کاری ب دوماهیک هاتبووم وەک ئەرکێ رۆژانە، لێ ژبەرکۆ راپۆرتێن بەرهەڤکریی نە هاتبوونە تمامکرن ئەز ژی نەچاربووم وەکی پتریا جارا ژ دەمێ خوو یێ مالباتێ و ژیانا تایبەت بدەمە کاری و راپۆرتێن پەخشێ خەلەکەیا زندی ئامادەبکەم. لڤێرێ دبیت هووینێن خواندەڤان وەسان هزر بکەن کۆ من دڤێت تیشکێ بدەمە سەر گرنگیا کارێ خوو و کا ئەز چەندێ خەمخۆربووم دکاری دا! دێ بەرسڤا من ژی نەخێر بیت. بەلکۆ من دڤێت دیاربکەم بۆچی من و وان هەمی هەڤکارێن خوو ئەوێن کۆ ئەو کەنال ب هێز و شیانێن خوو ئینایە هەبوونێ دەست ژێ بەردا و ئەوێن دیتر من نەڤێت ب ناڤ و پلا کاری دیاربکەم کا کینە هێشتا ل جهێ خوو نە و دبەردەوامن بۆ وەرگرتنا مووچە و پاداشتێن خوو ئانکۆ کار و خزمەتا جڤاکی یا بەرەڤ پاشڤەبری نەک پێشڤە. ئەگەر پرسیارا تەیێ/یا خواندەڤان ژ من ئەو بیت بۆچی هەوە بزاڤ نەدکر وان ژ کارێ وان لادەن دێ بەرسڤا من ئەڤە بیت. ما کەنگی نەزاهەت و دادوەریێ ل کوردستانێ جهێ خوو دیتیە ب درستاهی، تاکۆ ل سازیەکا راگەهاندنێ رۆلێ خوو ببینیت. دیسا دێ بێژم ما ئەگەر کانیا ئاڤێ ل سەری یا شێلی بیت، ما چ ژمن و تە دهێت. لەورا گەلەک دبێژن:

  • گۆنەهە ئەڤ کەنالە نەمینیت.
  • ئەو کەنالێ دەنگێ بەهدینانە.
  • بەهدینان یا ل پشت گۆهاڤێتیە.
  • خزمەت بۆ بەهدینان نە د ئاستێ پێدڤی دانە.
  • قەبیل ناکەین سۆرانیەک ببیتە سەرپەرشت و رێڤەبەرێ سازییەکا بەهدینان.

و ب دەهان ژ ڤان مانشێتێن بێ رامان و بێ مفا. لڤێرێ من دڤێت بێژم: ئەرێ باشە ما دێ کەنگی خەلکێ مە هشیار بیت و زانیت کۆ مەهانە کۆژمێن زەبەلاح ل ڤان جورە سازیان دهێنە مەزاختن بێکۆ دەرئەنجامێن ئەرینی هەبن. ئەرێ هووین دزانن چەند کەس ل ڤان جهان کاردکەن بێکۆ ئێک رۆژ دەوامێ فەرمی بکەن و ئەگەر بکەن ژی بتنێ ل سەر کیستێ خودان بەهرە و هێز و شیان و باوەرنامە دمافدارن نە زێدەتر.
بەلگە ل سەر گۆتنێن من ب سەدان گرۆڤە هەنە کۆ دەستەیێن ئیداریی یێن ڤان جورە سازیان نەشێن کەسەکی بکەنە بەرپرسێ بەشەکی ئەگەر مەلاق وڤەشارتی و گۆهدارێ گۆتن و کریارا وان نەبیت. یان ژی ئەگەر پسمام و خال و خارزا نەبیت. ژ بلی ئەگەر ب سەر وی لایەنی ڤە نەبیت و ئەگەر ئێک وەک من یێ کۆ ب سەر چ لایەنا ڤە نەبیت هەما ئەو ب شانس یێ هاتیە وەرگرتن و ب پشت راست دبێژم نەمانا وی/وێ ل وێرێ ئەڤرۆ یە بەر سبەهی.
ل دوماهیێ دێ بێژم نەمان باشترە ژ هەبوونەکا نەیی.

بۆ زانین ئەڤ وێنە د ژوورا من ئەوا کۆ تەرخانکری بۆ ئامادەکرن و مونتاژکرنا ئێک ژ پرۆگرامێن من ڤە ل دەمژمێر (٠٣:٥٦)ێ بەرێ سپێدێ هاتیە کێشان.

نڤێسین
ھۆگر مۆحەمەد سلێڤانەیی
سوێد / ستوکھۆلم
٠٢-٠٧-٢٠١٩

بیرا تە دھێت دەمێ تۆ!

من چجار نە گوتیە کەسێ بیرا تە دهێت دەمێ تو…

لێ گەلەک جارا ژی یا پێدڤیە تو بۆ رایا گشتی دیاربکەیی دێ چەوا مرۆڤ خوو پێشئێخیت نەخاسمە دەمێ ئەو کەسێن من پێ مەرەم ژ ئەڤی بابەتی کۆ ددەمەکی دا ئەو: سادە، تەپەسەر، بێ ماف، چنەزان، تۆزوبا، وەکی ئەم ب کوردی دبێژینێ گۆلک بوون و مە هەمی شیان دانە کاری رۆژانە وەک باب و برا ژیان بۆ شرۆڤەدکر لێ ل دوماهیێ وەک هەر کەسەکێ پیس رەڤین و خوو ب چمبلکێ کەسێن نووی ڤە گرتن و هوسا خوو ددەنە دیارکرن کۆ ئەو هەر تشتی دزانن ژ وان یێن کۆ ب کەدا دەست و مێشکێ مە وەرگرتين.

گەلەک کەس دشێن ببنە شاهـ لێ شاهێ درۆست ئەوە یێ مێشکێ شاهی ئاڤاکریی و کەرەک ل سەر زالکری بێکۆ ئەو بزانيت.
ئانکۆ دەما کەسی/ێ فێردکەی هەر تشتی نیشابدە بتنێ وێ خالێ نیشانەدە کۆ ئەو دێ چەوا خوو ل سەر تە زالکەت.

نڤێسین
ھۆگر مۆحەمەد سلێڤانەیی
سوێد / ستوکھۆلم
١٥-١٠-٢٠١٩

ما من نەگوتە تە؟

گەلەک جاران دژیانا خوو یارۆژانەدا ئەم ئەڤێ گوتنێ (ما من نەگوتە تە) بکاردئینین، نەخاسمە دگەل کەسێن نێزیک و خووشتڤی و جاران یێن دیتر ژی دهێتە بکارئینان و دگەلەک رەوشێن دیترژی دا. ئەڤجا چ رەشبین یان ژی د رەوشەکا گەشبین دا.

ژ دەست پێکا من هەست ب خووکریی من گەلەک بزاڤ یاکریی بۆ ئەڤێ گوتنێ کۆ بکەمە ماشێتەک بێ کۆ ئەز بکاربینم یان ئارستەیی کەسەکی/ێ بکەم، یێ/یا بەرامبەر دەمێ گوتنا من بەرچاڤ نەوەرگریت ئەها ل وی دەمی ئەو بخوو بزانیت کۆ من پێشدەم ئاماژە پێکربوو لێ بێکۆ ب ئەزمانێ خوو ئارستەی وی/وێ بکەم.
مەرەم ژێ ئەو نینە کۆ من دڤیا وان بکەمە ددەراڤەکێ نەخووش دا، بەلکۆ من دەرفەت ددا مێشکێ وان رۆلێ خوو ببینن و بریارا خوو یاتاکە کەسی بئینەجێهـ،
و بەرپرسیاربن ژ دەرئەنجامان بۆ گەرێن دوویڤدا.

مرۆڤ دڤێت نەیێ کێم بهابیت دهەست و ناخێ خوودا ل بەرامبەری خوو و دگەلدا دڤێت کریار مەرج بیت. ئەگەر دێ گەلەک گرفت هێنە هەبوونێ ژبەرکۆ هەمی کەس وەک هەڤ نینن دهزر و بۆچوونێن خوودا نەخاسمە دهەستێن خوو یێن کەسی دا. گەلەک جار کاردانەڤەیێن کەسێ/کەسا بەرامبەر دێ مرۆڤی هانددەنە وێ چەندێ کۆ دڤێت مرۆڤ پاداشتێ بدەت یان دێ ژناڤچی.

لەوما ژی پتریا کەسێن دکەڤنە دڤێ جورە رەوشێ دا ( گەنج )ن بمخابنی ڤە بۆ وێ چەندێ دزڤریت کۆ پتریا گەنجێ مە بزاڤ نەکریە خوو بنیاسیت، یان ژی بۆ خوو ئارستەیەکی ب هەلبژێریت، دیربیت ژ لاسایکرنا ژناڤچوونێ و خرابکرنا ناخێ خوو، گەلەک نەچیتە دناف بابەتێن کۆ وی ئالۆز دکەن وەکی بابەتێن سیاسی، کۆ مرۆڤ پێدڤی هزرەکا بەرفرەهـ دبیت و یا رەوا و بەرنیاسە کۆ گەنج د هزر و بیروباوەرێن خوو دا یێ ل قۆناغەکا هەستیار یانژی دشێین بێژین یا نەتمام هشیار وو هەستیار ژی.

دوماهیێ دێ بێژم ئەڤە من گووتە تەژی ئەیی یێ کۆ تە ئەڤ بابەتە خواندی، ئەڤجا بزاڤێ بکە رۆژەک نەهێت و بیر ل ئەڤێ نڤێسینا من بکەی و هەچکۆ من گووتبوو تەژی ( ما من نە گوتە تە ).

بۆ زانین ئەڤ وێنە ل دەمێ ئێک ژرۆمالێن تایبەت ب هەلکەفتێن جەژنێ ڤە ل کەنالێ وار هاتیە کێشان وەک دیار کۆ ( هەرمان محەمەد تاهر ) و ئێک ژ تیمێ کارێ وێنەگرتنێ ل پشت من دیارن. هەرمان دەرهێنەر بوو و ئەز ژی پێشکێشکاربووم دوێ رۆمالێ دا. ل وی دەمی دا ئەم تووشی رەوشەکا وەکی ناڤەرۆکا ئەڤی بابەتێ من ل سەری دیارکریی بووین و من و هەرمانی هەردووکا دگوتە وی هەڤالێ ئەم تووشکرین ( ما مە نو گوتە تە ). سلاڤ بۆ هەرمانێ برا.

نڤێسین
ھۆگر مۆحەمەد سلێڤانەیی
سوێد / ستوکھۆلم
٠٤-٠٧-٢٠١٩

ئەڤە ئەزم!

من هوسا خوو یێ نياسى و دێ هوسا مینم. دهۆکی مە، بەهدینی مە، کورێ کلیا فرعینی و شەدایێ مە، هەلکێشێ بایێ گەلی مە، ڤەخاریێ رۆیبارێ هشکە روویمە، کۆرێ دهۆکا چارمالی مە، کۆرێ کەلها مفتیمە، کۆرێ باژێرێ دوازدە تاخی مە، کۆرێ دێرا کەمبەلانی، مزگەفتا مەزن و مفتی و شێلێ ل بەری هەر تشتیمە، کورێ سیکا بن عەردیمە. نەڤیچرکێ مەلا شێخ شوکریمە و صالحی مە، ئەو زاروویێ نەخووشێ دەستێ دکتورا باجی قودرەت و جمیل منەشێ ئبراهیمێ جووهی و مستر جان و کەمبەلان و برووندیی و محەمەد دارتاش و ئاسنگەر و ددان هەلکێشێ دهوکیمە.

دھۆکا کەڤن

نەخووشێ دەرمانێ دەردێ حەفت دەرمانکی مە. ئەو زاروومە یێ ل کورا شمک زەرا یاریا کابانێ، تەبەلانێ، گوویانێ یا سێ شەقی دکر. گەرووکێ باژێرێ دوو ترۆمبێلا مارسیدسا ئاوروویی و جەجوویێ فەلە مە و پاشی پاصا عەتوویمە. سەرتراشێ بەردەستێ مامێ کەریم و شوکری و عوبەید و مامێ صالحێ نەشئەتم ل وێ دکانا تاری بەرامبەر مزگەفتا مفتیمە. پیرۆزکریێ ئێکەم گێرانا نەرۆزا فەرمیا دهۆکیا ل تەنیشت کورا ماوتییامە. کورێ باژێرێ بەفرێ مە و چێکریێ پێرجووکێن هەڤرستیمە. کورێ دەهواتیێن باژێری محەمەدێ ستیێ، محەمەد تاهر، سعیدێ زەلیخێ، مستێ یێ ئەحمەدێ گوویی، صالحێ زێرووی، صەمەدی، شەوکەتی، تارقی، شاکری، رەشیدێ عالیایێ مە. کورێ باژێرێ چەلاکێن ١٢ فانووسانیمە. کورێ باژێرێن کەدا دەستیمە کۆ کاموویێ حەمال و جەجوو، ئالامان، تیتوو، ئوسمان، ئێلیاسیمە. کورێ باژێرێ ئەحمووی، صالوویی، میروویێ دینم.

ئەڤان سەر خالان بخووینە دا باشتر بۆ تە رۆهنببیت:

  • دهۆکا چارمالی – دهۆکا کەڤن ژ چار مالان پێک دهات / سیکا بن عەردی – سەردابا نۆکە یا فێقی و زەرزەواتی.
  • مەلا شێخ شوکری – زانایەکێ تژی زانست د بیاڤێن جوودا جوودا دا.
  • هندەک ژ پەرستار و نوژدارێن دهۆکی یێن کەڤن – دکتورا باجی قودرەت، جمیل منەشێ ئبراهیم جووهی، مستر جان، کەمبەلان، برووندی، محەمەد دارتاش.
  • حەفت دەرمانک – ئێک ژ وان دەرمانان بوو ل دهۆکا کەڤن دهاتە ب کار ئینان.
  • کورا شمک زەرا – جهێ پرا شمک زەرا یا نۆکە.
  • سەرتراشێن دهۆکا کەڤن – کەریم، شوکری، عوبەید، صالحێ نەشئەت.
  • کورا ماوتییا – گورستانا دهۆکا کەڤن جهێ ئاڤاهیێ پارزگەها دهۆکێ ل تەنیشت ئاڤاهیێ دادگەها دهۆکێ یا کەڤن
  • پێرجووکێن هەڤرستی – دارەکێ درێژە وەکی دەستکێ مەرکا کۆلانێ یە چقلکەکێ ب سەرێ وی دار ڤە، دا وی داری د ئەردی قووتن ل رۆژێن بەفرین داکۆ شیانێن و چوونێ هەبان ل سەر بەفرێ هەبان.
  • چەلاکێن فانووسان – ل سالا ١٩٤٢ ل دهۆکێ ١٢ فانووس دهاتنە هەلاویستن ل سەرێن هەمی کۆلانێن دهۆکێ ب رێکا چەلاکەیەکێ درێژ کۆ ( عامودە ) ژ داران هاتبوونە چێکرن بۆ هەلاویستنا فانووسان.
  • حەمالێن دهوکێ – جەجوو، ئالامان، تیتوو، ئوسمان، ئێلیاسیمە / شێتێن دهۆکێ – ئەحموویێ دین ژ فیتکا توورە دبوو. صالوویێ دین ب روویدانەکا ترۆمبێلێ گیانێ خوو ژ دەست دا. میروو خەلکێ دەڤەرا (قافقات )بوو و ئێک ژ لەشکەرێن عوسمانیان بوو کۆ مابوو ل دهۆکێ ژ بێخوودانی و دەهر و کۆل و خەما دینببوو.

نڤێسین
ھۆگر مۆحەمەد سلێڤانەیی
سوێد / ستوکھۆلم
١٨-٠٩-٢٠١٩ێ
وێنە ژ ئەلبووما دھۆکا کەڤن ھاتینە ڤەگوھاستن

هندەک وێنێن دهۆکا کەڤن: